رفقا بالقوارير

يا سلام عليك ياعم احمد انت مكبر المسأله قوى
رفقا بالقوارير
بتاريخ: السبت، 2 مايو 2009

والله ياعم الحاج أحمد أنا شايفك متحامل شويتين قول تلاته على أم العيال باين عليك واخد حبوب شجاعه أو أم العيال ماشافتكش وانت بتكتب وعايز توقعنا فى شر أعمالنا وخد بالك انى لو كتبت لك الحقيقه اللى كل الناس تايهه عنها وهى ان أم العيال شايله الليله كلها مع بعض الرجاله ومابتشتكيش ولو أى حد مننا مكان الأمهات مايتحملش أكثر من ربع ساعه أنا عندى بنوته صغيره اسمها حنان لما أشيلها خمس دقايق مابتحملش رغم انها هاديه جدا........ ياعم أحمد الله يسترها معانا ومعاك ويعدى الليله دى على خير المهم بقول الله يكون فى عون أم العيال وأقعد أحمر فى عينى لحد أم العيال ما تخاف (مشيها تخاف متحرجنيش) وتاخد منى حنان وبصراحه هما بيتعبوا قوى فى البيت واحنا نيجى ناكل ونلبس ع الجاهز ياعم المفروض نعمل لهم نقابه ونسميها نقابة النسوان المظاليم ونحط صورتك كعدو أول للنسوان ومطلوب تصفيتك جسديا وطبعا لو متجوز أكيد صفوك عقليا وفكريا وفلوسيا المهم عشان منخرجش بره البيت قصدى الموضوع الستات بيتعبوا قوى واحنا مرتاحين ونستحق الولعه عشان مابنقدرش ماعلينا متشوف لك موضوع تانى غير الموضوع بتاع أم العيال ده أصل أنا حبيتك لله فى لله كده وهبقى أقول لك السبب بينى وبينك...... أنهى كلامى بان الرسول عليه الصلاة والسلام أوصانا بهم وقال (استوصوا بالنساء خيرا)بالمناسبه الا قوللى فين النساء عشان نتوصى بيهم ده احنا معانا ملايكه زمانك بتقول دلوقت الراجل ده صحفى ازاى وماعندوش شجاعه أقولك ياسيدى الشجاعه فى كل حاجه الا دى (ملحوظه) أم العيال ربنا يديها الصحه ويخليهالى قاعده جنبى وماليش حد أنام عنده وربنا يجعل كلامنا خفيف عليهم